O resumo da semana, dende o 17 de febreiro ao 21 de febreiro.

 

Resumo da Semana da Celtic Crew

Bos días! Somos Lucía, Sara e Luck, e queremos compartir convosco o resumo da nosa semana na clase Celtic Crew.

Luns: Comezamos a semana cun concurso moi especial: The Celtic Chef! Cada un de nós tivo que expoñer e cociñar un prato típico dun país, pero con dúas condicións: debía axustarse a unha dieta específica e superar un pequeno hándicap. Foi unha actividade divertida e desafiante, onde aprendemos moito sobre gastronomía e adaptación de receitas.

Martes: Algunhas persoas da nosa aula fixeron a recuperación do exame de matemáticas. Ademais, asistimos a unha charla moi interesante sobre os impostos en España, onde comprendemos mellor como funcionan e para que serven os tributos que pagamos. Non é maxia, son os teus impostos...

Mércores: En inglés tivemos un gran reto: 66 apartados que puxeron a proba os nosos coñecementos e habilidades na materia. Un auténtico desafío que nos fixo traballar e poñer en práctica as nosas capacidades.

Xoves: Foi un día de aprendizaxe e exposicións. Algunhas compañeiras e compañeiros presentaron os seus libros favoritos, compartindo historias e recomendacións de lectura. Ademais, Nora sorprendeunos cunha exposición sobre o valor dos obxectos, facéndonos reflexionar sobre a súa importancia máis alá do material. Tamén falamos sobre as fake news e como identificalas, aprendendo a recoñecer información falsa nos medios de comunicación.

Venres: Iniciamos o Ecopreguntoiro, relacionado co tema 2 de Ciencias Sociais. A continuación, varios compañeiros e compañeiras entregaron as narrativas de lingua galega. En educación física, gozamos dun tempo de xogo libre, onde tivemos a liberdade de escoller entre fútbol, baloncesto e outras opcións. Ao final da xornada, aqueles que non remataron o traballo de plástica levárono para casa. Como broche final, tivemos unha charla sobre Rosalía de Castro, na que aprendemos máis sobre a súa vida e obra. Seguimos destapando fakes e falamos da operación de falsa bandeira, dos casus belli ou detonantes da guerra e de como USA lle quitou Cuba a España en base a unha fake news propagada polo xornalista Pulitzer, entre outros. Coñecemos a canle de YouTube chamada Lo que no te cuentan los libros de historia e aproveitamos tamén para informar da importancia das NARRATIVAS e de como imos ter que tomar os nosos propios apuntamentos para o traballo do seguinte tema de naturais e sociais, así que toca poñerse as pilas.

Boa finde e a seguir hunting fake news!

O Celtic Chef 2025: Un banquete de talento e creatividade

 

Non hai palabras que poidan expresar o orgullo que sinto por todos os participantes do Celtic Chef. O evento foi moito máis que un concurso de cociña: foi unha mostra de traballo en equipo, creatividade, capacidade de adaptación e deportividade. Ver a toda a rapazada implicada, defendendo os seus pratos con paixón e con ese toque persoal que fai única a nosa tripulación celta, foi sinxelamente espectacular.

Un agradecemento especial para Xabier, de 5º de primaria, quen exerceu como presidente do xurado con moita seriedade e compromiso. Tamén queremos recoñecer a Fins, que representou ás familias no xurado e aportou a súa visión culinaria, así como á nosa directora Sabela, que axudou nas labouras de produción, e á profe Candela, sempre disposta a botar unha man para que todo saíse perfecto. Sen vós, este evento non tería sido o éxito que foi.

E por suposto, grazas a todas as familias, que colaborastes e vos implicastes dun xeito incrible. A vosa axuda e apoio fan posible que experiencias coma esta sexan inesquecibles para os nenos e nenas.

Pero o máis importante: aquí non había perdedores. Só con participar e presentar o voso traballo, xa erades gañadores. E podo prometer que non houbo un só prato que non estivese á altura da gala. O xurado marchou co bandullo cheo e coa sensación de que cada equipo deu o mellor de si. Todos fostes capaces de adaptardes os vosos pratos ao país escollido, ás dietas específicas e aos diferentes desafíos, mantendo sempre un espírito deportivo e colaborativo.

Tamén quero destacar como xa ides collendo táboas para falar en público, como soubestes vender e defender os vosos pratos diante do xurado, tanto coas vosas producións en vídeo coma respondendo en directo ás preguntas. Esa seguridade, ese esforzo e esa confianza en vós mesmos son aprendizaxes que van moito máis alá da cociña.

Para futuras edicións, deixamos a semente dunha nova idea: a próxima será de tarde... e queremos ver ás familias coas mans na masa! 

Para pechar, déixovos unha frase de Vygotsky que resume á perfección o espírito do Celtic Chef:

"O verdadeiro desenvolvemento do ser humano prodúcese a través da interacción coa comunidade que o rodea.”

Grazas, Celtics! Xa estamos desexando a próxima edición.